Hebrews 8
Iesu Anu Muxali Kisi'a ta Aili'i Noxinge Teitexi no Opo Loxotolo
1Ioxe, vaikala e nenge talelemolu ne laaxu maninasou aloxo 'o. Nenge menge kisi'a ta aili'i vile lailaixe a uxoxolu. Anu muxolu mutalupexa no anu puloulou noxou tatananu tuala ane tatila manina uxolu teitexi no opo loxotolo, la mulai muxolu no pa'umolu no avolu tema. 2Anu muxolu uxaxai loxo aili'i no taasou Lataua teitexi no loxotolo. Tani ne anu tani alelaxu tavuna noxou Lataua e Anu Lataua molu mutulusou, ia ta mitema itulusou no avo'a uasi.3Xo kisi'a ta aili'i ne xaixai sou ino'u mimii sou ilai ilosou Lataua loxo anu na'u xe i'elaxu mimii ulai noxou, la anu Iesu kalumo u'oxonu xaixai iouvilesisi aloxo ane'i mi'oxonu ne. 4Lexe Anu uxolu no lia 'o la Anu umomomo sou uxali loxo aili'i uasi, xo ta aili'i a mixolu tei 'o sou ino'u mimii ulai noxou Lataua loxo anu na'u loxo lapuloto muvikala ne. 5 aAne'i mixolu mixaxaisou xaixai noxi'a loxo ta aili'i no nano no anu taasou lalotu no lialia 'o. Taasou lalotu no lia 'o ne anu musosovosou xe tovola'i sou taasou lalotu maninasou uxolu teitexi no opo loxotolo. Tava'u aloxo ne la sou no mine Lataua muvikalanu Mosesi sou tani alelaxu tavuna noxou Lataua la Anu mupeletotosou la muvikala aloxo 'o, “No mine nini natulusou taasou lalotu ne, la anu laixe lexe nini natulusou umomomo aloxo eni elosienixu teitexi no laxa'ilu ne, ia natulusou no anu masaxa noxine mamu.” 6 bIa xaixai noxi'a ta aili'i mose'i. Xo anu Iesu muxali loxo itema utulu nonixi sou u'oxonu pekia'usou opo vilesisi alavua ne mua'ulixu ane mu'oxonu tei ne. Mo mimii e Lataua muxalixu opo vilesisi la musakiinu vaikala sou tano'u ne mua'ulixu mimii e muxalixu opo vilesisi la musakiinu vaivaikala noxi'a ane'i tatei lexe ino'u ne.
7Xo lexe susu vile uxali no anu opo vilesisi e Lataua musakiinu tei uasi, la umomomo sou opo vilesisi alavua uxali la uasi. 8 cIa Lataua muxalisou susu noxi'a ta mitema la muvikala aloxo 'o,
“Tila muvikala lexe, ‘Ngalomu, eni esosovosou voxo vile a unene'e sou
eni axalixu opo vilesisi alavua no tani noxi'a ta Isilaeli xe no tani noxi'a ta Iuta.
9Opo vilesisi nexi noxi'a tesakinu ne
iou loxo ane eni e'oxonu noxi'a ta 'ilusu'ilusune'i tatei ne,
no mine eni etila'a no avo'a sou elaalixa'a ne Aixiputo mine'e 'o uasi.
Xo ane'i imulinu vaikala e nexi noxi'a tesakiinu sou opo vilesisi ne uasi,
la sou eni Tila exiunu tumalilo noxi'a.’
10Eni Tila avikala aloxo 'o,
No anu voxo ane ne, axalixu opo vilesisi no nixine'i ta Isilaeli ne aloxo 'o.
Eni amuxaxu lapuloto noxilo uxolu no anu xavutalai'a
mo akaukavunu vaikala noxilo uxolu no nano no tane'i.
Mo eni axolu loxo ane'i Latauai'a xe ane'i ixali loxo eni ta mitemaxeni.
11Mo anu voxo ane ne la umomomo sou vile la uvikalane'i
xe ulosiouxu menexu vile mo vimou vile,
la uvikalane'i lexe, ‘Ngingi laixe lexe ngalavusou Lataua,’ la uasi.
Xo ane'i tavu'alo musoko noxi'a ta kitukitu'a moso 'o ne
mulai muxali noxi'a ta kisokisou ta tatila ne milavusilo mukalusi,
12Xo ane'i milavusilo, la sou eni alulusou susu noxi'a e mi'oxonu ne
la axavutalanu la uasi.”
13Aloxo ne la sou no anu vaikala sou muxalixu opo vilesisi alavua la ne, la anu mumaxa'u opo vilesisi ane Anu musakiinu tei ne anu teinu. Xe mii ane muxali teinu ne anu umomomo sou uxolu maxuveeni uasi, xo anu mamuxanu xe u'ui la ukalu vitanisi.
Copyright information for
ATA